“Ngrijnë” pasuritë e Belle Air

Një Gjykatë në Tiranë ka vendosur që mbi pasuritë e kompanisë ajrore « Belle Air » të mos kryhet asnjë veprim apo ndërhyrje nga përmbarimi, deri në shprehjen e gjykatës lidhur me falimentimin e kompanisë

Të hënën, gjykata ka pranuar kërkesën e paraqitur nga avokati i kompanisë, për vendosjen e masës së sigurisë së perkohshme mbi asetet e kompanisë. Sic transmeton Top-Channel, avokati Avni Shehu ka thënë se kjo masë është e domosdoshme për të mbrojtur gjendjen e kompanisë dhe kreditorët e saj, për të mos ndodhur asnjë abuzim me të.

Po në këtë seancë, gjykata ka dëgjuar për raportin e ekspertës kontabël, të caktuar për të kryer vlerësimin e situatës financiare në të cilën gjendet kompania.

Sipas ekspertës, kompania ajrore plotëson kushtin ligjor për paraqitjen e falimentimit.

Ekspertja thotë se shoqëria nuk ka likuiditete dhe ka akumuluar një borxh afatshkurtër që llogaritet në shumën e 21.5 milionë eurove.

Në përfundim të seancës, gjykata i kërkoi gjithashtu Drejtorisë së Tatimeve bilancet e tre viteve të fundit të kompanisë.

Belle Air ndërpreu fluturimet në datën 24 nëntor duke lënë në dyert e aeroportit me qindra udhëtarë që kishin prenotuar për të kryer udhëtimet me këtë kompani deri dhe ditën kur shoqëria deklaroi falimentimin.