Niveli i krimit dhe i korrupsionit mbetet i lartë

Luftimi i krimit të organizuar dhe pasurisë së paligjshme, duhet të ketë bazë ligjore dhe të luftohet nga të gjithë, është thënë nga pjesëmarrësit në tryezën e organizuar nga Instituti Demokratik i Kosovës.

Në këtë debat ka pasur mospajtimendërmjet pozitës dhe opozitës kosovare për luftimin e krimit të organizuar dhe korrupsionit.

Zëvendëskryeministri dhe Ministër i Drejtësisë, Hajredin Kuçi, ka thënë se me ligjin kundër korrupsionit, krimit të organizuar dhe pasurisë së paligjshme nën llupë do të jenë qeveritarët, shoqëria civile, opozita dhe gjithë qytetarët.

Ndërsa deputeti i “Vetëvendosjes”, Glauk Konjufca ishte kritik ndaj qeverisë, duke thënë se nuk mund të luftohet korrupsioni në vend, përderisa atë e bëjnë udhëheqësit politik dhe ata që qeverisin.

Ndërkaq gjykatësja dhe Kryetarja e KQZ-së, Valdete Daka, ka thënë se gjykatat e Kosovës nuk mund të jenë fajtore për nivelin e këtyre dukurive.

Sipas saj, ato kanë pasur shumë pak lëndë në duar për shkak se rastet e rënda janë kompetencë e EULEX-it.

Të gjithë folësit e kësaj tyreze kanë deklaruar se niveli i krimit të organizuar, por edhe pasurisë së paligjshme është i lartë në Kosovë.