Një «malësor» vdes i vetëm në pyll

Trupi i një tetëdhjetëvjeçari u zbulua më 14 gusht në malin e Brülisau (Argau/Argovie). Prej më se 30 vjetësh ai ka jetuar i vetëm në një kasollë të ndërtuar në mesin e pemëve me pllaka metalike si çati. Ekspertët shkencorë të Cyrihut duhej të ndërhynin për të tërhequr rreth 100 kilogramë eksploziv të gjetur në shtëpizën e plakut.

Të afërmit e plakut kishin dhënë alarmin për zhdukje një javë më parë, tregon Roland Koster, zëdhënës i policisë kantonale të Appenzellit. Oficerët policorë pastaj kanë shkuar në pyllin Brülisau, ku gjendej kasolla e paligjshme e të ndjerit, në të cilën jetonte prej më shumë se 30 vjetësh. Ata së pari duhej të kalonin një gardh me gjemba teli para se të zbulonin trupin e pajetë dhe të dekompozuar të plakut.

Instituti i Mjekësisë Ligjore e St- Gallen ka përcaktuar se i ndjeri kishte vdekur natyrshëm disa javë më parë. Nuk ka dyshim mbi identitetin e tij. Banori i pyllit ishte i njohur nga vendësit dhe nuk kishte pasur kurrë probleme me policinë.

Kasolla e ndërtuar në mes të një pylli të vogël është praktikisht e padukshme nga jashtë. Policia gjithashtu ka zbuluar më shumë se 100 kg eksploziv të vjetër të viteve dyzeta. Specialistët kanë evakuuar këtë eksploziv me ndihmën e zjarrfikësve. Ndërsa në garazhin e tetëdhjetëvjeçarit janë gjetur gjithashtu armë të ndryshme.