Një qendër profesionale për migracionin

Përpilimi i analizave të rrezikshmërisë do të jetë detyrë kryesore e qendrës, e cila do t`i nënshtrohet kompetencave të Sekretariatit Shtetëror për Migracion

Në Zvicër, gjatë vitit 2014 kanë kërkuar azil 24 mijë persona. Po gjatë atij viti, policia dhe rojat e kufirit kanë kapur 17.000 migrantë ilegalë dhe 384 kontrabandues me qenie njerëzore, që është shifra më e lartë e regjistruar ndonjëherë deri tash.

Nisur nga kjo gjendje, federata dhe kantonet planifikojnë të themelojnë një qendër të përbashkët profesionale për migracionin. Në këtë qendë do të kishin përfaqësimin e tyre autoritetet e fushës së hetimeve dhe të gjithë aktorët e administrimit të kufijve, shkruan “Sonntagszeitung”.

Ajo që dëshirohet të arrihet me këtë institucion të ri është shfrytëzimi më i mirë i sinergjive dhe optimimi i rrjedhjes së informacioneve në mes të qendrës dhe kantoneve me qëllimin që të luftohet në mënyrë më efikase migracioni ilegal.

Federata po ashtu synon që përmes kësaj qendre të re të identifikojë dhe parashikojë me kohë flukset e refugjatëve, transmeton albinfo.ch. Përpilimi i analizave të rrezikshmërisë do të jetë detyrë kryesore e qendrës, e cila do t`i nënshtrohet kompetencave të Sekretariatit Shtetëror për Migracion.

Projekti mendohet të realizohet deri në vitin 2017. Kjo qendër është pjesë e një plani me emrin “menaxhimi i integruar i kufijve”, që ka 70 pika.
Krahas migracionit ilegal, me këtë plan pritet të luftohet edhe kriminaliteti ndërkufitar.