Një ngjarje tragjike sërish ka tronditur Vlorën dhe gjithë Shqipërinë. Siç raportojnë mediat vendase, një vajzë 10-vjeçare ka ndërruar jetë, pasi është mbytur në plazhin e Portonovës, në zonën e Zvërnecit në Vlorë.
Ngjarja ka mundur të jetë më tragjike, por nëna e saj dhe kushërira u shpëtuan nga pushuesit e tjerë që ndodheshin në zonë.
Dëshmitarët kanë treguar se dy vajzat ndodheshin në ujë kur janë gjetur në vështirësi dhe në drejtim të tyre ka shkuar nëna e viktimës, por nuk ka mundur të shpëtojë dot të bijën.
Ndërkohë, xhaxhai i vajzës ka tentuar që të mbytej vetë në det dhe për këtë arsye, policia e ka prangosur atë.
Një muaj më parë në të njëjtin vend humbën jetën kushërirat Manuela Maraj dhe Xhoana Cani. Në momentin që ato po mbyteshin në ndihmë të tyre shkoi 24-vjeçari nga Tetova, Beniamin Ferati, por asnjë nga të rinjtë nuk doli më në breg i gjallë.
