Një viktimë dhe mbi 300 raste të reja me Covid-19 në Maqedoninë e Veriut

KEYSTONE/EPA/GEORGI LICOVSKI

Një person i prekur me Covid-19 vdiq gjatë 24 orëve të fundit në Maqedoni të Veriut, ndërsa u regjistruan edhe 322 raste të reja.

“Gjatë 24 orëve të fundit është regjistruar një humbje jete nga Shkupi (86 vjeç), i cili ka humbur jetën në spital. Sipas Regjistrit të personave të vdekur me diagnozë COVID-19 nga Termini im, janë raportuar edhe 5 humbje jete, nga Shkupi (1), Gostivari (1), Kumanova (1), Tetova (1) dhe Manastiri (1), të moshës prej 66 deri në 87-vjeçare. Nga personat e raportuar të vdekur, 3 persona kanë humbur jetën në shtëpi, ndërsa 2 persona në spital. Personat e raportuar kanë humbur jetën në periudhën prej datës 25.02.2022 deri me 22.03.2022”, informoi Ministria.

Nga numri total i rasteve pozitive (322), janë regjistruar 42 riinfeksione. Gjatë 24 orëve të fundit u shëruan 308 persona nga Covid-19.

Numri i rasteve aktive në Maqedoninë e Veriut është 1.972.