Njësia Speciale Operative e Policisë së Kosovës, proteston të enjten për pagën dhe shtesën e rrezikshmërisë

Njësia Speciale Operative e Policisë së Kosovës të enjten nga ora 11, do të protestojë para Qeverisë së Kosovës.

Sipas njoftimit të publikuar nga mediat në Kosovë, protesta është organizuar për të shprehur pakënaqësinë me pagën dhe shtesat e rrezikshmërisë, teksa ndër të tjera theksohet se kjo protestë do të jetë vetëm hapi i parë sindikal i tyre, përcjell albinfo.ch.

“Njësia Speciale Operative (ROSU), njësi e dëshmuar dhe e njohur për detyrat dhe operacionet specifike e me rrezikshmëri të lartë, në shenjë pakënaqësie për pagën dhe shtesën për rrezikshmëri, paralajmëron se do të shfrytëzoj të drejtën sindikale të protestës përpara objektit të Qeverisë së Republikës së Kosovës. Me këtë rast do të shpalosen specifikisht kërkesat të cilat janë të domosdoshme dhe të nevojshme. Gjithashtu me anë të këtij njoftimi bëhet me dije se ky është vetëm hapi i parë sindikal”, thuhet në njoftim.

Ndryshe, gjatë ditës së sotme është raportuar se Njësia Speciale e Intervenimit, FIT do të protestojë të mërkurën, për të shprehur pakënaqësitë e tyre lidhur me pagat, rrezikshmërinë dhe shtesat e tjera.