Nora Gjakova, kampione e Evropës

Kjo javë padyshim mund të konsiderohet “java e sportit shqiptar”, pasi që përveç Nora Gjakovës, kampionë botë në peshëngritje u bënë edhe Romela Begaj dhe Daniel Godelli

Xhudistja kosovare, Nora Gjakova është shpallur kampione e re e Evropës për U-23, n[ Evropianin e xhudos që po mbahet në Wroclaw të Polonisë , duke përmbyllur një cikël të suksesshëm të sportistëve shqiptarë në botë.

Pas kësaj fitore, kjo javë padyshim mund të konsiderohet “java e sportit shqiptar”, pasi që përveç Norës, kampionë botë në peshëngritje u bënë edhe Romela Begaj dhe Daniel Godelli.

Xhudistja Nora Gjakova në finale mposhti rusen, Anastasia Konkina duke arritur suksesin më të madh personal. Gjakova është kolege me kampionen e dyfishtë të botes në xhudo, Majlinda Kelmendin, e cila është konsideruar si krenaria sportit kosovar.  

Para Gjakovës edhe Romela Begaj ka fituar medaljen e artë në kampionatin Botëror të peshëngritjes në stilin e shkëputjes në peshën 63 kilogram. 28-vjeçarja ngriti 113 kg në këtë stil duke lënë pas vetes peshëngritësen me emër në arenën ndërkombëtare.

Ndërsa, të mërkurën, edhe Daniel Godelli arriti të fitojë medaljen e artë në Kampionatin Botëror të peshëngritjes, në stilin e shkëputjes në kampionatin botëror që po mbahet në Kazakistan.

Po ashtu sot boksi kosovarë është pranuar me të drejta të plota në Federatën Botërore të Boksit, duke shënuar suksesin më të madh pas pranimit të Komitetit Olimpik Kosovar në Komitetin Botëror Olimpik.