Novobërdës i mungon zyra e diasporës

Komuna e Novobërdës nuk ka të dhëna sesa njerëz kanë emigruar jashtë vendit

Kreu i Komunës, Bajrush Ymeri, në një takim me përfaqësues nga Ministria e Diasporës ka shprehur domosdoshmërinë e hapjes së një zyre të diasporës në Novobërdë.

Në një takim të martën me Shukrije Ramadanin, udhëheqëse e Divizionit për Koordinim të Investimeve dhe Shani Hamitaga, zyrtar i lartë për Koordinim të Investimeve nga Diaspora, është thënë se Zyra për Diasporë do të jetë një urë lidhëse në mes të Ministrisë së Diasporës dhe Komunës së Novobërdes.

Shukrije Ramadani ka thënë se nëse do të kemi një zyrë të Diasporës në këtë komunë do t`i kemi lidhjet shumë më të lehta.

Ministria e Diasporës, respektivisht Departamenti i Hulumtimeve dhe Përkrahjes së Investimeve, përpos punëve të tjera, planifikon të krijojë një databazë të të dhënave për mërgimtarët të cilët ushtrojnë bizneset e tyre në Diasporë dhe të atyre mërgimtarëve që ushtrojnë biznes në Kosovë.

„Përvojat kanë treguar se çdo bashkëpunim institucional ka efekte të shumëfishta dhe kësaj radhe po ju drejtohemi për bashkëpunim dhe bashkëveprim të ndërsjellë“, ka thënë Ramadani.

Kryetari i Komunës së Novobërdës, Bajrush Ymeri, ka shprehur gatishmërinë për nismën e Ministrisë për të kontribuar dhe bashkëpunuar në këtë drejtim për themelimin e kësaj zyre.

“Ne jemi mirënjohës për bashkatdhetarët tanë që jetojnë në diasporë dhe ne si shoqëri duhet t’iu kushtojmë një vëmendje të posaçme, sepse ata kontribuuan dhe janë duke kontribuar po ashtu në të gjitha sferat e jetës në Kosovë. Për ne hapja e kësaj zyre do të jetë e mirëseardhur, sepse përveç tjerash, do të dimë edhe sa njerëz kemi jashtë vendit tonë, të njoftohemi me ta, ta kenë ata një përfaqësues të tyre këtu”, ka thënë kryetari i Novobërdës, Bajrush Ymeri, për mediat lokale.