Nuk përkrahet ideja për Shtetet e Bashkuara të Evropës

Ideja e liderit të Partisë Socialdemokrate të Gjermanisë (SPD), Martin Schulz, për të formuar Shtetet e Bashkuara të Evropës, nuk gëzon mbështetje të madhe në mesin e evropianëve, në bazë të rezultateve nga një anketë online të kompanisë “South”, përcjell albinfo.ch.

Sipas anketës, 30 për qind e gjermanëve thanë se ata mbështesin “idenë e Shteteve të Bashkuara të Evropës”. Ky rezultat tregon se Gjermania është një vend që i jep mbështetjen më të madhe Schultzit, në krahasim me gjashtë vende të tjera evropiane, në të cilat është realizuar studimi.

Të anketuarit francezë e mbështesin me 28 për qind idenë e Schulz-it. Nga ana tjetër, ky propozim ka mbështetjen më të vogël në Mbretërinë e Bashkuar, ku vetëm 10 për qind e të anketuarve thanë se janë “për” këtë ide.

Në vendet e tjera të anketuara: Danimarkë, Suedi, Finlandë dhe Norvegji, përqindja e atyre që mbështesin idenë e Schultz-it është mes 12 dhe 13 për qind.

Udhëheqësi i SPD-së në fillim të këtij muaji kishte propozuar përgatitjen e projekt-marrëveshjes kushtetuese, në mënyrë që deri në vitin 2025 Bashkimi Evropian të transformohet në Shtetet e Bashkuara të Evropës.