Nuk pritet rezultat pozitiv nga KE

Ekspertët e integrimeve evropiane mendojnë se Raporti i Progresit për Kosovën sivjet do të jetë negativ, pasi që Kosova nuk i ka përmbushur as rekomandimet e vitit të kaluar

Komisioni Evropian me 8 tetor do ta publikoj Raportin e Progresit për Kosovën, ndërsa ekspertët e integrimeve evropiane, nuk po presin diçka pozitive, pasi që institucionet e Kosovës, siç thonë ata, nuk kanë arritur t’i përmbushin rekomandimet që KE i ka dhënë një vit më parë.

Në tetor të vitit të kaluar, Komisioni Evropian iu kishte rekomanduar autoriteteve në Prishtinë që të përmbyllin reformën zgjedhore, reformën administrative e publike, të fuqizojnë institucionet e pavarura në fushën e rendit dhe ligjit, etj. 

Në të gjitha këto çështje, Kosova sipas njohësve të integrimeve evropiane, ka çaluar. Madje reformat në fushat e përmendura nuk janë është bërë, ndërkohë zgjedhjet e 8 qershorit janë mbajtur pa reformë zgjedhore.

“Reforma nuk është bërë, por, megjithatë, kemi pasur zgjedhje të mira. Mbase reforma e administratës publike është pika më e dobët, për shkak se, jo vetëm që nuk është vazhduar me reformë, por administrata publike ka vazhduar të degradoj edhe më tutje”, ka thënë eksperti i integrimeve, Shenoll Muharremi.

Mendim të ngjashëm ka edhe profesori i të Drejtës evropiane, Avni Mazreku.

Duke folur për REL, ai thotë se të gjithë faktorët politik  ishin pajtuar që të merren me përgatitjen e zgjedhjeve të parakohshme dhe rrjedhimisht, të mos merren fare me reformën zgjedhore.

Ndërkaq, reforma e administratës publike, sipas tij, nuk ka qenë sfidë vetëm e këtij viti, por që nga viti 2008, kur Kosova kishte shpallur pavarësinë e saj.

“Në qoftë se e marrim çështjen e reformës zgjedhore, Kosova nuk e ka përmbushur këtë sfidë, të identifikuar nga Raporti i Progresit. Në reformën e administratës publike, në vazhdimësi, institucionet e Kosovës dhe ata që kanë qeverisur me Kosovës, kanë dështuar”, tha Mazreku.

Prishtina zyrtare, sipas tij, nuk ka dështuar që nuk e kanë njohur këtë problem, por kanë dështuar vetëm si rezultat i mungesës së vullnetit politik, sepse administrata publike, siç tha Mazreku, është përdorur si instrument, si mekanizëm, për t’i akomoduar militantët partiak.