OBI rikonfirmon apelin për njohjen e Kosovës

Ministrat e Jashtëm të OBI-i, po ashtu riafirmojnë apelin e bërë edhe me Rezolutën paraprake dhe deklaratën finale të liderëve të shteteve anëtare, për njohjen e Kosovës nga të gjitha shtetet anëtare.

Këshilli i Ministrave të Jashtëm i Organizatës së Bashkëpunimit Islamik (OBI), gjatë takimit vjetor që e ka zhvilluar në selinë e Kombeve të Bashkuara në Nju Jork, edhe një herë iu ka bërë thirrjen shteteve islamike që të njohin shtetin e pavarur dhe sovran të Kosovës.

　

Në takim, siç njofton MPJ në Prishtinë, përveç të tjerave është vlerësuar lartë progresi i vazhdueshëm që po bëhet në forcimin e demokracisë dhe puna e institucioneve të Kosovës në shërbim të paqes dhe stabilitetit në tërë territorin e Kosovës dhe rajon.

　

“Në takim u vlerësua edhe marrëveshja e arritur më 19 prill 2013 në Bruksel ndërmjet Kosovës dhe Serbisë, me lehtësimin e BE-së, duke i bërë thirrje palëve për implementimin e plotë të saj”, njofton MPJ.

　

Ministrat e Jashtëm të OBI-i, po ashtu riafirmojnë apelin e bërë edhe me Rezolutën paraprake dhe deklaratën finale të liderëve të shteteve anëtare, për njohjen e Kosovës nga të gjitha shtetet anëtare.

　

Po ashtu ministrat e OBI-it, kanë bërë thirrja që të vazhdohet kontributi i vendeve të OBI-it për fuqizimin ekonomik të Republikës së Kosovës.

　

Para mbledhjes së Ministrave të Jashtëm të OBI-t, ministri i Punëve të Jashtme i Kosovës, Enver Hoxhaj, ka zhvilluar një takim me sekretarin e përgjithshëm të Organizatës, Ekmeleddin Ihsanoglu.

　

Gjatë takimit, Hoxhaj ka kërkuar nga sekretari Ihsanoglu që OBI të mbaj në agjendë dhe të përkrahë rritjen e numrit të njohjeve për Republikën e Kosovës.

　

Ministri Hoxhaj me këtë rast ka shprehur mirënjohje për përpjekjet e vazhdueshme të sekretarit Ihsanoglu dhe për mbështetjen e dhënë për Kosovën në fuqizimin e subjektivitetit ndërkombëtar.

　

Deri më tani, Kosova është njohur nga 35 prej 57 vendeve anëtare të Organizatës për Bashkëpunim Islamik.

---