O’Brien i impresionuar me zhvillimin që ka bërë Kosova

Nënsekretari i shtetit në Departamentin Ndërkombëtar për Zhvillim (DFID) për Çështje Evropiane, Stephen O’Brien, ndryshe nga zyrtarët tjerë ndërkombëtarë që vizitojnë Kosovën e që ikin të zhgënjyer, është ndjerë i impresionuar me zhvillimin që ka bërë Kosova dhe me përkushtimin e institucioneve të Kosovës për përmbushjen e obligimeve ndërkombëtare.

Ai në një intervistë për “Zërin” ka theksuar se Britania e Madhe do të vazhdojë të jetë një partner i fuqishëm për Kosovën edhe në të ardhmen, duke e ndihmuar që të jetë një shtet i përkushtuar për qytetarët e saj.

“Të gjitha çështjet për të cilat ne kemi qenë partner me Kosovën kanë arritur progres shumë të madh”, ka deklarur O’Brien. “Kur mendon se ku ishin gjërat në Kosovë dhe ku kanë arritur, është një progres enorm dhe kjo jep besim për të ardhmen”, shprehet ai.

Sipas tij, rreth 13 vjet më parë është iniciuar fillimisht një ndihmë shumë e madhe për arsye humanitare, një kohë shumë e vështirë ajo për Kosovën. “DFID ka qenë shumë i kënaqur që ishte në gjendje për të vazhduar programin e përkrahjes për nevojat e zhvillimit për Kosovën’, ka theksuar ai. /zeri&albinfo/