Organizata Botërore e Turizmit këtë vit pret rimëkëmbje sikur para pandemisë

(KEYSTONE/Anthony Anex)

Organizata Botërore e Turizmit ka njoftuar se këtë vit presin që turizmi global të kthehet në normalitet sikur para pandemisë Covid-19.

Sipas kësaj organizate, e cila operon në kuadër të Kombeve të Bashkuara, rritja e lidhjeve ajrore globale dhe një rimëkëmbje e tregjeve aziatike do të mund të bëjë një rikthim të plotë të aktiviteteve turistike në mbarë botën gjatë këtij viti, por megjithatë paqëndrueshmëria gjeopolitike në Lindjen e Mesme konsiderohet si një rrezik për industrinë, përcjell albinfo.ch.

Ndër të tjera, kjo organizatë ka bërë të ditur se në vitin 2023 kërkesa për udhëtime në Evropë dhe Afrikë arriti në nivelet sikur para pandemisë dhe i tejkaloi ato në Lindjen e Mesme, ndërsa disa destinacione, si Evropa Mesdhetare, Karaibet dhe nënrajonet e Amerikës Qendrore dhe Afrikës Veriore, vitin e kaluar tejkaluan shifrat e turizmit ndërkombëtar që u regjistruan në vitin 2019, raporton Reuters.

Organizata pret që turizmi në Kinë të rritet në vitin 2024, pasi qeveria lejoi udhëtimin pa viza për qytetarët e Francës, Gjermanisë, Italisë, Holandës, Spanjës dhe Malajzisë deri më 30 nëntor 2024, teksa këtë vit kapaciteti i fluturimeve për në dhe jashtë Kinës do të rritet po ashtu.

Kontributi i përgjithshëm i turizmit në ekonominë globale në vitin 2023 ishte 3.3 trilionë dollarë, sipas raportit.