Osmani bën homazhe në Prekaz, jep mesazhin e rëndësishëm për shqiptarët

Presidentja e Kosovës, Vjosa Osmani, ka deklaruar se është flamuri kuq e zi dhe data 28 Nëntor që na kujton çmimin e lartë të lirisë dhe njëkohësisht sakrificat që janë bërë për shekuj në mënyrë që të gjithë të jetojnë të lirë, përcjell albinfo.ch.

Osmani pasi bëri homazhe në Kompleksin Memorial në Prekaz, tha se dita e sotme është moment reflektimi për të gjithë atë që heronjtë tanë kanë bërë për shqiptarët.

“Sot e fillojmë këtë ditë historike, duke nderuar një figurë dhe një familje, e cila është po aq historike sa vetë flamuri kuq e zi, familjen Jashari, njëkohësisht duke shënuar ditëlindjen e komandantit legjendar Adem Jashari dhe daljen e parë publike të Ushtrisë Çlirimtare të Kosovës më 28 nëntor 1997. Është flamuri kuq e zi dhe data 28 nëntor që na kujton secilit prej nesh çmimin e lartë të lirisë dhe njëkohësisht sakrificat që janë bërë për shekuj në mënyrë që të gjithë të jetojnë të lirë. Sot shqiptarët kudo që janë e shënojnë këtë ditë, e njëkohësisht është edhe moment reflektimi për të gjithë atë që heronjtë tanë kanë bërë për shqiptarët, që nga heroi Gjergj Kastrioti Skënderbeu, deri tek Ismail Qemaili, Hasan Prishtina, Isa Boletini e deri tek heronjtë e viteve 90, Adem Jashari.

Lavdi të gjithë atyre që kanë dhënë për lirinë e Shqipërisë, për lirinë e Kosovës”, tha ajo.