Osmani: Serbia është përgjegjëse për krimet në Kosovë

Presidentja e Kosovës, Vjosa Osmani, ka thënë se Serbia mban përgjegjësi të drejtpërdrejtë për krimet e kryera në Kosovë, përfshirë edhe krimet seksuale ndaj grave.

Osmani i bëri këto komente në takimin që kishte sot me një grup të Rrjetit të Grave të Asamblesë Parlamentare të Frankofonisë, të udhëhequra nga Chantal Soucy, kryetare e Rrjetit të Grave Parlamentare, njëherësh nënkryetare e Asamblesë Kombëtare të Kebekut në Kanada, raporton Albinfo.ch.

Presidentja dhe delegacioni i Rrjetit të Grave të Asamblesë Parlamentare diskutuan edhe për kujdesin, të cilin institucionet e Kosovës po e tregojnë për gratë e dhunuara gjatë luftës në Kosovë dhe përpjekjet që, krahas përkrahjes, të sigurohet edhe drejtësi për to, thuhet në një komunikatë nga Zyra e Presidentes.

Presidentja Osmani e njoftoi znj. Soucy edhe me përgatitjet për Forumin për Gruan, Paqen dhe Sigurinë, i cili sivjet do të mbahet për herë të dytë dhe e ftoi atë dhe gratë parlamentare të Asamblesë Parlamentare të Frankofonisë që të marrin pjesë në të.

Osmani tha se Forumi për Gratë, Paqen dhe Sigurinë shërben si instrument i rëndësishëm për promovimin e të drejtave të grave dhe përparimin e mëtejmë të pozitës së tyre në shoqëri dhe pjesëmarrje më të lartë në jetën institucionale.

Ndërkaq Soucy u shpreh e lumtur për vizitën dhe theksoi se do të vazhdojë të punojë për promovimin e mëtejmë të lirive dhe të drejtave të grave./Albinfo.ch