Presidentja Osmani takohet me senatoren amerikane

Flasin për thellimin e bashkëpunimit mes dy vendeve

Presidentja e Kosovës, Vjosa Osmani, ka pritur në takim senatoren Joni Ernst nga Senati i Shteteve të Bashkuara të Amerikës.

Osmani ka deklaruar se në takim kanë diskutuar për thellimin e bashkëpunimit mes dy vendeve.

“Kënaqësi të mirëpres Senatoren Joni Ernst nga Senati i Shteteve të Bashkuara të Amerikës. Diskutuam për thellimin e bashkëpunimit ndërmjet dy vendeve tona, e në veçanti bashkëpunimin e shkëlqyeshëm në fushën e mbrojtjes si dhe fushat e tjera”, ka thënë Osmani në profilin e saj në Facebook..

Ndryshe, një delegacion i Kongresit amerikan, që udhëhiqet nga senatorja republikane, Joni Ernst, po viziton Prishtinën.

Senatorja nga shteti i Ajovës, Ernst, ka shërbyer mbi 23 vjet në Ushtrinë amerikane dhe po ashtu është gruaja e parë, veterane e ushtrisë, që u zgjodh në Senatin amerikan.

Në maj të vitit 2021, trupat e FSK-së, së bashku me anëtarët e Gardës Kombëtare të Ajovës, u nisën në mision në Kuvajt. Ky është misioni i parë jashtë vendit i FSK-së.

 

---