Osmani: Zgjedhje në veri, në përputhje me kornizën kushtetuese

Zyra e Presidentes se Republikes se Kosoves

Pas takimit që pati Presidentja e Kosovës, Vjosa Osmani, me të dërguarin e Shteteve të Bashkuara të Amerikës për Ballkanin Perëndimor, Gabriel Escobar dhe përfaqësuesin e Bashkimit Evropian për dialog, Miroslav Lajçak, ka bërë të ditur që zgjedhjet e jashtëzakonshme në katër komunat veriore të Kosovës mund të mbahen vetëm në përputhje me kornizën kushtetuese e ligjore.

“Presidentja Osmani ka potencuar se zgjedhjet e reja në komunat në veri të vendit mund të organizohen në përputhje me kornizën aktuale kushtetuese e ligjore dhe, në këtë kontekst, ajo shtoi se duhet të sigurohet pjesëmarrje demokratike e qytetarëve që jetojnë në këto katër komuna”, thuhet në njoftimin e Zyrës së Presidentes së Kosovës, përcjell albinfo.ch.

Tutje bëhet e ditur se presidentja Osmani ka shprehur përkushtimin e plotë që të punohet së bashku me partnerët ndërkombëtarë në mënyrë që në veri të vendit të sundojë rendi e ligji dhe të ruhet sovraniteti i Republikës së Kosovës.

Ajo tutje ka shtuar se duhet bërë ndëshkimi i grupeve kriminale dhe individëve që përdorën dhunë ndaj policisë, gazetarëve, pjesëtarëve të KFOR-it, EULEX-it dhe qytetarëve, është rruga e vetme për stabilitet të qëndrueshëm dhe afatgjatë, përcjell albinfo.ch.