Pa pasaportë në Shqipëri dhe Mal të Zi

Kalimi bëhet vetëm me letërnjoftim dhe vlen gjatë sezoni turistik në tre muajt e verës, qershor, korrik dhe gusht

Dita e sotme, një qershori, ka qenë dita e parë e zbatimit të praktikës për kalimin pa pasaporta të kufirit të Kosovës me Shqipërinë dhe atij me Malin e Zi. Vendkalimet kufitare u mundësojnë të gjithë shtetasve të Kosovës që në vendet e përmendura të kalojnë me letërnjoftim. Ndërsa, siç bëjnë të ditur zyrtarë të Policisë së Kosovës,  fëmijët nën moshën 16 vjeç, mund të kalojnë me një dokument, ku duhet bashkangjitur një fotografi identifikuese.

Fillimi i qershorit shënon edhe fillimin e sezonit turistik. Dy pikë-kalimet kufitare: ai në Morinë që lidh Kosovën me Shqipërinë dhe pikë kalimi kufitar në Kullë që lidh Kosovën me Malin e Zi, janë të gatshme për pritje të fluksit të turistëve nga të dyja anët e kufirit. Sipas zëdhënëses së Policisë së Kosovës, Sabrije Kamberi, janë marrë të gjitha masat për të përballuar fluksin e madh gjatë muajve të verës. Ajo tha se nuk do të ketë pritje të gjata të qytetarëve në këto vendkalime kufitare.

Më tutje Kamberi ka thënë për Radio Kosovën se janë marrë masa jo vetëm për të përforcuar shërbimet policore në doganë, por janë shtuar edhe postblloqet e policisë përgjatë aksit rrugor Bajram Curri – Qafë Morinë, me synimin e vetëm parandalimin e ndonjë ngjarje të papëlqyer. Kalimi me letërnjoftim vlen gjatë sezoni turistik në tre muajt e verës, qershor, korrik dhe gusht.