Pacolli do Agjenci për Investime

Behgjet Pacolli planifikon të formojë një Agjenci për Investime, si mundësi e mirë për tërheqjen e investitorëve të huaj

Zëvendëskryeministri i Qeverisë së Kosovës, Behgjet Pacolli ka shpalosur idenë për krijimin e një agjencie për investime, e cila do të jetë një urë lidhëse ndërmjet Kosovës dhe investitorëve të huaj.

Këtë ide zëvendësshefi i qeverisë e ka prezantuar gjatë një takimi që zhvilloi me një delegacion nga Zvicra.

Pacolli, i cili me koalicionin e tij në qeverisjen Thaçi, drejton dikasteret ekonomike, është takuar me një delegacion të Kantonit Jura të Zvicrës, i cili kryesohej nga Philipe Receveur, ministër për Transport pranë këtij kantoni dhe kryebashkiaku i qytetit Delemont Pierre Kohler.

Ky delegacion po qëndron në Kosovë me ftesë të zëvendëskryeministrit Pacolli.

“Gjatë këtij takimi, Pacolli ka diskutuar për mundësitë që ofron Kosova për investitorët zviceran. Ai, në këtë drejtim, ka informuar përfaqësuesit e shtetit helvetik për iniciativën e krijimit të Agjencisë për participime, si mundësi e mirë për tërheqjen e investitorëve të huaj”, thuhet në njoftimin e qeverisë.

 Zëvendëskryeministri kosovarë, ndërkaq ka marrë lëvdata nga zviceranët për këtë iniciativë, si alternativë e mirë për joshjen e investitorëve të huaj.