Pacolli i jep ultimatum LDK-së: Nëse nuk ndryshoni qëndrim, shkoj me PAN-in

Behgjet Pacolli ka thënë se LDK dhe Vetëvendosje kanë 10 ditë kohë që të reflektojë në të kundërtën nuk do ta mbaj peng zhvillimin e Kosovës. Ai pritet t’i bashkohet Ramush Haradinajt në qeverinë e re

Kryetari i Aleancës Kosova e Re, Behgjet Pacolli, i cili në zgjedhjet e 11 qershorit ishte në koalicion me LDK-në dhe Alternativën, ka dhënë sot shenja se mund ta braktisë koalicionin parazgjedhor për t;iu bashkuar Ramush Haradinajt në koalicionin PAN (PDK-AAK-Nisma). Ai ka thënë se LDK dhe Vetëvendosje kanë 10 ditë kohë që të reflektojë në të kundërtën nuk do ta mbaj peng zhvillimin e Kosovës.

Në emisionin “Debat” në RTK, që do të transmetohet sonte në ora 20:00, Pacolli rrëfen se ka bërë hapin e parë drejt zhbllokimit të ngërçit politik. Ai ka paralajmëruar se nuk do të mbajë të bllokuar Kosovën dhe institucionet e vendit, prandaj Lidhja Demokratike e Kosovës, sipas tij, ka 10 ditë kohë për të ndryshuar qëndrimin nga bllokuesi në zhbllokues të institucioneve.

Nëse Pacolli me 4 deputetët e tij i bashkohet kolaicionit PAN, atëherë Ramush Haradinaj dhe Kadri Veseli do t’i keni në koalicionin e tyre 63 vota, që konsiderohen të mjaftueshme për zgjedhjen e kryetarit të Kuvendit dhe formimin e qeverisë  së re me kryeministër Ramush Haradinajn.