Para takimit të 14 shtatorit, Lajçak kërkon mbështetjen e Gjermanisë për dialogun

Një javë para takimit të radhës të nivelit të lartë ndërmjet Kosovës dhe Serbisë, emisari i Bashkimit Evropian për dialogun Kosovë-Serbi, Miroslav Lajçak, ka takuar zyrtarë gjermanë, të cilët i ka falënderuar për mbështetjen e Gjermanisë për këtë proces.

Ai është takuar me Jens Plotner, këshilltarin e kancelarit gjerman, Olaf Scholz. Po ashtu ka pasur takim edhe në Ministrinë e Punëve të Jashtme të Gjermanisë, transmeton Albinfo.ch.

Si temë kryesore ka qenë takimi i nivelit të lartë në mes të Kosovës dhe Serbisë, ku më 14 shtator në Bruksel do të takohen kryeministri i Kosovës, Albin Kurti, me presidentin e Serbisë, Aleksandër Vuçiq.

Atë takim Lajçak e ka cilësuar si rrugë drejt normalizimit të marrëdhënieve mes Kosovës dhe Serbisë.

”Pati diskutime të rëndësishme në Kancelarinë dhe @GermanyDiplo sot për gjendjen e lojës në dialog dhe rrugën përpara përpara takimit të javës së ardhshme. U fokusua në nevojën për progres në zbatimin e Marrëveshjes për Rrugën drejt Normalizimit. Faleminderit për mbështetjen e fortë ”, ka shkruar Lajçak në Twitter.

Takimi i 14 shtatorit vjen, pasi në muajt e kaluar të këtij viti ka pasur tension në Veriun e Kosovës, pas zgjedhjeve lokale të prillit në komunat veriore.

Ato zgjedhje i fituan kryetarët shqiptarë, pasi votimet u bojkotuan nga Lista Serbe, parti që hapur është e lidhur me Beogradin zyrtar. /Albinfo.ch