Parlamenti Evropian me rezolutë për zgjerimin, kërkohet heqja e vetos për vendet anëtare

Keystone EPA/CHRISTOPHE PETIT TESSON

Parlamenti Evropian i ka dhënë miratimin rezolutës për procesin e zgjerimit të Bashkimit Evropian. Përmes këtij dokumenti kërkohet që ky proces të bëhet më efikas, përfshirë heqjen e përdorimit të vetos për vendet anëtare.

Rezoluta kërkon gjithashtu që BE-ja të ketë një buxhet më efikas, në mënyrë që të jetë në gjendje të përballojë zgjerimin me vende të reja anëtare. Rezoluta u mbështet nga 305 deputetë, ndërsa 157 deputetë votuan kundër dhe 71 abstenuan.

Bashkimi Evropian, aktualisht, për secilin vendim në fushën e politikës së jashtme dhe sigurisë, ku hyn edhe procesi i zgjerimit, duhet të veprojë me konsensus. Kjo ka bërë që shpesh vendimet të bllokohen nga ndonjë shtet anëtar përmes vetos, edhe kur të gjitha të tjerat ishin në favor.

Kjo është rezoluta e fundit për procesin e zgjerimit që miraton Parlamenti Evropian në këtë përbërje, pasi zgjedhjet e reja për Parlamentin Evropian do të mbahen në muajin qershor.