Parlamenti Evropian votoi për ndalimin e tarifave për bagazhet e dorës në linjat ajrore

Ligjvënësit e Bashkimit Evropian votuan të martën për të ndaluar linjat ajrore që të vendosin tarifa shtesë për bagazhet e vogla të dorës, duke mbrojtur kështu të drejtën e pasagjerëve të mbajnë me vete në bord sende personale si çanta dore, çanta shpine apo laptop pa pagesë shtesë, shkruan The Local, transmeton albinfo.ch.

Ky propozim synon të zbatojë një vendim të Gjykatës Evropiane të Drejtësisë nga viti 2014, sipas të cilit mbajtja e bagazhit të dorës nuk duhet t’i nënshtrohet tarifave shtesë, nëse përmbush kriteret për peshën dhe dimensionet dhe është në përputhje me kërkesat e sigurisë.

Aktualisht, shumë linja ajrore me kosto të ulët lejojnë vetëm një send personal falas, ndërsa tarifojnë për çdo bagazh tjetër dore, duke krijuar konfuzion dhe shpenzime të papritura për pasagjerët.

Megjithatë, masa nuk është përfundimtare dhe duhet të miratohet edhe nga të gjithë eurodeputetët në Parlamentin Evropian dhe nga qeveritë e vendeve anëtare në Këshillin e BE-së.

Sektori i aviacionit kundërshton këtë ndalim, duke argumentuar se kufizon zgjedhjen e konsumatorëve dhe mund të çojë në kosto më të larta për pasagjerët që nuk kërkojnë bagazh të shtuar, transmeton albinfo.ch.

Përveç kësaj, eurodeputetët miratuan ndryshime të tjera që forcojnë të drejtat e pasagjerëve, përfshirë:

Të drejtën që fëmijët nën 12 vjeç të ulen pranë shoqëruesve të tyre pa pagesë shtesë.

Udhëtimin falas për personat që shoqërojnë pasagjerët me lëvizshmëri të kufizuar.

Kompensim për humbjen ose dëmtimin e pajisjeve ndihmëse ose kafshëve ndihmëse.

Formulare të përbashkëta për rimbursime në rast vonesash ose anulimesh.

Mbrojtje për udhëtarët në udhëtime me më shumë se një mënyrë transporti, si aeroplan dhe autobus, duke u siguruar ushqim, pije dhe qëndrim falas në hotel në rast vonesash.

Eurodeputeti italian Matteo Ricci tha se këto rregulla synojnë të mbrojnë të gjithë pasagjerët, me vëmendje të veçantë për personat me aftësi të kufizuara, dhe të sqarojnë përkufizimin e bagazhit të dorës falas deri në një madhësi maksimale prej 100 cm.

Këto ndryshime synojnë gjithashtu të rrisin transparencën për pasagjerët në lidhje me kostot totale të biletave dhe procesin e rimbursimit.

Parlamenti Evropian dhe Këshilli po vazhdojnë diskutimet për një rishikim më të gjerë të rregullave të kompensimit për vonesat dhe anulimet e fluturimeve, transmeton albinfo.ch.

---