Parlamenti i Shqipërisë nuk lejon arrestimin e Tahirit

Parlamenti i Shqipërisë votoi për të mos i dhënë prokurorisë leje për të arrestuar Saimir Tahirin, shkruajnë mediat shqiptare.

Mazhoranca votoi me 75 vota pro raportin e saj që i lejon prokurorisë vetëm të kontrollojë banesën e ish-ministrit të Brendshëm, përcjell albinfo.ch.

Gjatë votimit nuk pati asnjë befasi, por vetë Saimir Tahiri nuk mori pjesë. Në fillim të seancës vetë deputeti Tahiri para se të linte sallën tha se mirëpriste çdo vendim.

Ndërkohë, në fjalën e saj pas votimit, Monika Kryemadhi tha se ka votuar pro arrestimit të ish-ministrit Saimir Tahirit.

“Sot treguat që nuk shkëputeni sot nga krimi dhe me votën tuaj treguat se i jepni shanse krimit dhe drogës. Treguat që keni frikë nga e vërteta dhe që jeni peng i krimit dhe i trafikut të drogës. Sipas Komisionit të Venecias, thuhet se Këshillimi i Mandateve nuk shqyrton provat, por veprimi tregon se mazhoranca nuk do që të realizojë reformën në drejtësi dhe ta kthejë atë në një vegël të trafikimit të drogës dhe krimit të organizuar. I themi punë të mbarë të gjitha bandave, por jam e bindur që shqiptarët janë të neveritur nga shfaqjet hipokrite që bëni dhe se si bandat kriminale po drejtojnë vendin!”, është shprehur Kryemadhi.