Pas vrasjes së Liridona Murselit, të martën, protestë në Prishtinë

Foto FB: Kolektivi për Mendim dhe Veprim Feminist

Kolektivi për Mendim dhe Veprim Feminist, të martën e 5 dhjetorit, duke filluar nga ora 18:00 në sheshin “Zahir Pajaziti” në Prishtinë do të organizojë protestë në mbrojtje të grave pas rastit të fundit të vrasjes së Liridona Murselit, e cila dyshohet se u porosit nga bashkëshorti i saj, Naim Murseli.

Ky kolektiv në njoftim e ka cilësuar këtë protestë si “gjithëpopullore”, përcjell albinfo.ch.

“Ju njoftojmë se këtë të martë, 5 dhjetor, duke filluar nga ora 18:00, ne thërrasim protestë gjithëpopullore në sheshin “Zahir Pajaziti” në Prishtinë. Thërrasim në organizim dhe veprim të gjitha/ë anembanë Kosovës që të mblidhemi dhe të themi njëzëri që nuk ka paqe pa sigurinë e grave dhe të kërkojmë që dhuna e gjinizuar dhe femicidi të trajtohen si urgjencë kombëtare”, thuhet në njoftim.

Ndryshe, Kolektivi për Mendim dhe Veprim Feminist ka njoftuar se do të organizojë një aksion simbolik të dielën pranë Pallatit të Drejtësisë, ku pritet të mbahen seanca gjyqësore për vrasjen e Liridona Murselit.