Pasojat e ndalimit të veturave me naftë në Gjermani

Kompanitë e mëdha si Volvo, Porsche dhe Toyota, kanë vendosur që të mos prodhojnë më vetura me naftë

Vendimi i gjykatës në Gjermani për të ndalur veturat me naftë në qendrat urbane, pritet të ketë shumë pasoja.

Kompanitë e mëdha si Volvo, Porsche dhe Toyota, kanë vendosur që të mos prodhojnë më vetura me naftë, përcjell albinfo.ch.

Tashmë edhe prodhuesi-italian FCA ka njoftuar se nuk do të prodhojë më vetura me naftë. Kjo pritet të ndodhë nga viti 2022.

Megjithatë, motorët dizel do të vazhdojnë të jenë të pranishëm, por do të rriten në mënyrë të ndjeshme versionet hibride dhe do të debutojnë modele elektrike 100 për qind.

Prodhuesi i Porsches, me seli në Zuffenhausen në Gjermani, është gati të hedhë në treg në vitin 2019 veturën e parë elektrike. Megjithatë, nuk do t’i braktisë përgjithmonë motorët me naftë. Thjesht ai është duke pritur të prezantojë gjeneratën e re të motorëve dizel, gjatë këtij viti.

Ndërkohë, Toyota, ka vendosur të pezullojë shitjen e automjeteve me motor me naftë në Itali duke synuar vetëm te modelet me benzinë dhe hibride.

Sa i përket Mercedes, Grupit Volkswagen dhe BMW, strategjia është e ngjashme. Do të ketë investime të mëdha tek automjetet elektrike, por nuk do të braktisen automjetet me motor dizel.

Gjatë vitit 2017, për herë të parë nga viti 2009 deri më 2015, në Evropë, shitjet e veturave me motor me benzinë ua kaluan atyre me motor dizel, me një rënie të këtyre të fundit me 17% krahasuar me vitin 2016.

Shifrat ndryshojnë nga njëri vend te tjetri, me Gjermaninë, ku shitjet e automjeteve me motor me benzinë ua kalojnë atyre me naftë, respektivisht 61.7% me 34%, kurse në Itali konfirmohet preferenca për naftën, duke arritur në 56.7%.