Pensionistët kërkojnë të drejtën e tyre për pension

"E drejta për pension është e patjetërsueshme dhe nuk mund të humbet e as të ndryshohet me asnjë akt të mëvonshëm juridik"

Përfaqësues të organizatave të pensionistëve nga të gjitha komunat e Kosovës, si dhe Kryesia e Bashkimit të Pensionistëve dhe të Invalidëve të Punës (BPIPRK) morën vendim unanim, se në qoftë se nuk rezulton pozitivisht takimi i planifikuar me kryeministrin e vendit lidhur me plotësimin e kërkesave të tyre të kamotshme, do të nisin protesta deri në përmbushjen e plotë të tyre.

Kryetari i BPIPRK-së, Shaban Kajtazi, në kuvendin e kësaj organizate ka paraqitur pozitën e vështirë materiale të pensionistëve kosovarë, si dhe përpjekjet për kthimin e të drejtave të tyre për pension.

Sipas tij, kërkesën e fundit për takim me kryeministrin Hashim Thaçi e kanë bërë para 10 ditësh.

Ai i ka përkujtuar Qeverisë se e drejta për pension është e patjetërsueshme dhe nuk mund të humbet e as të ndryshohet me asnjë akt të mëvonshëm juridik.

Drejtori ekzekutiv i Këshillit për Mbrojtjen e të Drejtave dhe Lirive të Njeriut (KMDLNj), Behxhet Shala, ka vlerësuar se ky këshill do të qëndrojë pas pensionistëve, pavarësisht se çfarë vendimi do ta marrin ata deri tek plotësimi i kërkesave të tyre, raportojnë mediet kosovare.