Për krizën energjetike në Kosovë, VV-ja e bën fajtore MZHE-n

“Klani Pronto është duke e shkatërruar edhe Trepçën, e cila është para kolapsit”, ka deklaruar Kadaj Bujupi

Ministria e Zhvillimit Ekonomik është fajtore për krizën energjetike që pritet të ndodhë në Kosovë. Kështu ka thënë deputetja e zgjedhur e Lëvizjes Vetëvendosja, Donika Kadaj Bujupi në një konferencë për media ku ka akuzuar edhe qeverinë Mustafa. Ajo ka thënë se si pasojë e mosmarrjes së masave nga ministri i Zhvillimit Ekonomik, Blerand Stavileci, do të ketë reduktime të energjisë, ku më së shumti do të pësojnë bizneset.

Sipas saj, kjo po bëhet me qëllim të përfitimit të njerëzve të PDK-së, të përfshirë në këtë treg. “Klani Pronto është duke e shkatërruar edhe Trepçën, e që është para kolapsit”, ka deklaruar Kadaj Bujupi në një konferencë për media transmeton albinfo.ch.

Dy ditë më parë ministrja në detyrë e Tregtisë dhe Industrisë, Hykmete Bjarami ka thënë se ekzekutivi e ka marrë shumë seriozisht këtë çështje dhe do të bëjë një zgjidhje të pranueshme.