Për terrorizëm akuzohen dy kosovarë

Prokuroria ka bërë me dije se aktakuza është ngritur ndaj A.L. dhe N.B, njëri pjesëmarrës në grupin Al Nusra tjetri në ISIS

Prokuroria Speciale e Republikës së Kosovës ka ngritur aktakuzë ndaj dy kosovarëve, njëri me nënshtetësi franceze, për pjesëmarrje në grupe terroriste në Siri. Prokuroria ka bërë me dije se aktakuza është ngritur ndaj A.L. dhe N.B, njëri pjesëmarrës në grupin Al Nusra tjetri në ISIS.

“A.L dhe N.B., kanë shkruar në Siri, ku i janë bashkangjitur organizatës terroriste Al Nusra dhe atë, i pandehuri A.L nga një fshat i komunës së Kaçanikut, në periudhën kohore nga muaji nëntor 2013 deri në majin gusht 2014”, ka njoftuar Prokuroria Speciale e Kosovës.

I pandehuri N.B sipas prokurorisë, në muajt e parë të 2013-tes ka qenë në Siri dhe “për shkak të konflikteve që kanë pasur grupi terrorist Al Nusra me organizatën tjetër terrorist ISIS, janë kthyer në Republikën e Kosovës”. Aktakuza është ngritur nga një prokuror vendor i Prokurorisë Speciale të Kosovës dhe e njëjta është dërguar në Departamentin për Krime të Rënda të Gjykatës Themelore në Prishtinë.

Ndryshe, në bazë të ligjit që ka miratuar Kuvendi i Kosovës, pjesëmarrja në një luftë të huaj dënohet nga 5 deri në 15 vjet heqje lirie. Deri më tani në luftën qytetare në Siri e Irak, mendohet se kanë marrë pjesë rreth 300 qytetarë, ndërsa 200 prej tyre janë hetuar apo po akuzohen nga drejtësia kosovare.