Përditësimet Izrael-Hamas: Hamasi liron grupin e tretë të pengjeve

Foto nga arkiva (KEYSTONE/AP Photo/Fatima Shbair)

Militantët e Hamasit kanë liruar më shumë pengje izraelitë të dielën, ditën e tretë të armëpushimit teksa Egjipti tha se Izraeli do të lironte 39 palestinezë në këmbim.

Sipas raportimeve nga DW një grup tjetër pengjesh izraelitë u dorëzuan nga grupi militant i Hamasit të dielën në shkëmbimin e tretë të tillë që nga fillimi i një armëpushimi katër-ditor.

“Bazuar në informacionin e marrë nga Kryqi i Kuq, 14 pengje izraelite dhe tre pengje shtetas të huaj janë transferuar në Kryqin e Kuq”, postoi IDF në rrjetin social “Twitter”, shkruan albinfo.ch.

Megjithatë, agjencia e lajmeve Reuters citoi Hamasin të thoshte se 13 pengje ishin izraelitë, tre ishin tajlandez dhe një shtetas rus. Arsyeja e mospërputhjes nuk ishte menjëherë e qartë.

Hamasi ndërpreu raundin e dytë të shkëmbimeve të shtunën pasi akuzoi Izraelin për shkeljen e kushteve të armëpushimit duke mos lejuar ndihma në Gaza, akuzë e cila u mohua nga Izraeli.

Megjithatë, ndërmjetësit në Katar më vonë njoftuan se çështja ishte zgjidhur dhe Hamasi liroi 17 pengje të shtunën vonë në mbrëmje, duke përfshirë 13 izraelitë dhe katër shtetas tajlandezë. Në këmbim, Izraeli liroi 39 të burgosur palestinezë.

Ndryshe, të premten, Hamasi liroi grupin e parë prej 24 pengjesh izraelitë dhe të huaj.