Përfundimi i regjistrimit të popullsisë, çka do të ndodhë me personat që s’janë regjistruar?

Të premten ka përfunduar procesi i regjistrimit të popullsisë në Kosovë. Kreu i Agjencisë së Statistikave të Kosovës (ASK), Avni Kastrati, ka thënë se ata persona që nuk janë regjistruar “nuk mund marrin shërbime nga shteti, nëse merret përvoja e shteteve të tjera”.

Sipas tij, misioni i ASK-së ka përfunduar, dhe brenda një muaj e gjysmë pritet t’i publikojnë rezultatet preliminare.

“Të gjithë ata persona që janë regjistruar gjatë kësaj kohe do të jenë pjesë e regjistrimit të popullsisë. Ne presim që për një muaj e gjysmë të dalim me të dhëna preliminare. Kishim një takim këtë javë me përfaqësueses të komunave dhe një ndër pikat kyçe është nëse ka ndonjë ekonomi familje apo individë që ende nuk është regjistruar, për të cilën do qoftë arsye”, tha Kastrati.

“Ne si statistikë e kemi kryer mision tonë, janë institucione që ofrojnë shërbime, sigurisht nëse merret përvoja e shteteve tjera ata personat që janë pjesë e regjistrave, pjesë e sistemit, nuk besoj që mund të kenë benfite apo shërbime nga shteti nga institucionet”, shtoi ai./Radio Dukagjini