Përfundon numërimi i votave të diasporës

Siç raportojnë mediat vendore më shumë se 5 mijë vota janë numëruar dhe më shumë se 50 % kanë votuar për Lëvizjen Vetëvendosje, kurse pjesa tjetër ka shkuar për partitë tjera

Ka përfunduar edhe numërimi i votave nga diaspora për zgjedhjet e 11 qershorit në Kosovë.

Siç raportojnë mediat vendore më shumë se 5 mijë vota janë numëruar dhe më shumë se 50 % kanë votuar për Lëvizjen Vetëvendosje, kurse pjesa tjetër ka shkuar për partitë tjera, përcjell albinfo.ch.

Kështu VV mund të fitojë edhe një mandat për deputet, duke ia marrë LDK-së. Mësohet se numërimi me kusht fillon të hënën, kurse certifikimi i rezultatit zgjedhor pritet të ndodhë në fund të javës.

Pas kësaj kanë ardhur edhe reagimet nga VV-ja. Ish-deputetja e VV-së, Albulena Haxhiu, duke falënderuar mërgatën dhe duke thënë se kjo ka qenë arsyeja pse nuk u ndryshuan asnjëherë procedurat burokratike të votimit jashtë vendit.

“Arsyeja kryesore se pse asnjëherë nuk u ndryshuan procedurat burokratike të votimit jashtë vendit dhe pse nuk u zgjat afati për regjistrim të qytetareve jashtë vendit, është pikërisht se po të shtohej numri i votuesve jashtë vendit, do të rritej edhe më shumë Lëvizja   Këtë e dinin shumë mirë penguesit e votës jashtë vendit! Me gjithë pengesat e qëllimshme, mijëra bashkatdhetarë votuan. Këto vota u numëruan sot dhe mbi 50% e votave të bashkatdhetarëve, janë për VETËVENDOSJE!-n Faleminderit mërgatë”, shkruan Haxhiu.

Donika Kadaj-Bujupi e ka falënderuar Diasporën për besimin e tyre në Lëvizjen Vetëvendosje. “Udhëtuan gjatë, paguan shtrenjtë biletat, humbën ditë pune e shkolle, sakrifikuan, erdhën dhe votuan me zemër. Mërgata bëri ndryshimin. Faleminderit!”, ka shkruar Kadaj.