Përkeqësohet situata energjetike dhe nisin mungesat e furnizimit me ujë

Situata e furnizimit me energji elektrike është më e keqe se vitin e kaluar, kur kishte një njësi aktive në TC “Kosova A” dhe vendi nuk ballafaqohej me temperatura të larta dhe ekstrem

Për dy ditë me radhë Kosova po përballet me një situatë shumë të vështirë energjetike, për shkak të ndërprerjes së paplanifikuar të prodhimit të energjisë në Korporatën Elektroenergjetike të Kosovës (KEK). Burime zyrtare nge KEK-u i kanë thënë të enjten Radio Kosovës se situata e furnizimit me energji elektrike është më e keqe se vitin e kaluar, kur kishte një njësi aktive në TC “Kosova A” dhe vendi nuk ballafaqohej me temperatura të larta dhe ekstreme.

Po ashtu për situatën e vështirë energjetike ka njoftuar edhe Kompania për Furnizim me Energji Elektrike, e cila përmes një komunikate për shtyp bënë të ditur se Kosova është e detyruar të importojë energji elektrike që është e disponueshme në treg, por me çmim shtatë herë më të shtrenjtë se ai i zakonshmi.

Përveç mungesës së energjisë elektrike, qytetarët e Kosovës në këto temperatura të larta, po përballen edhe me reduktime të ashpra të ujit të pijshëm. Zëdhënësja e Ujësjellësit Rajonal “Prishtina”, Arieta Mjeku, ka thënë se ashpërsimi i reduktimeve të ujit po ndodh për shkak të keqpërdorimit të ujit, ndërkaq, sipas saj rezervat në liqene ende janë në kuota normale.