Përmbytjet në Pakistan: “Swiss Solidarity” mbledh 5.3 milionë CHF

Foto ilustrim @pixabay

Një vit pas nisjes së fushatës për Pakistanin, “Swiss Solidarity” ka mbledhur donacione që arrijnë në 5.3 milionë CHF (6 milionë dollarë).

Ajo ka financuar nëntë projekte dhe ka ndihmuar më shumë se 415,000 viktima të përmbytjeve shkatërruese, teksa do të vazhdojë angazhimin e saj në muajt në vijim, shkruan swissinfo, përcjell albinfo.ch.

Më shumë se 3.7 milionë CHF janë investuar në nëntë projekte të zbatuara nga partnerët e saj zviceranë në terren, kështu Helvetas, Save the Children Switzerland, Solidar Suisse dhe Terre des hommes ishin në gjendje të ofronin shpejt ndihmë emergjente dhe të nisnin projekte rindërtimi afatgjatë.

Në fazën emergjente pas përmbytjeve, organizatat u përqendruan në shpërndarjen e ushqimit dhe të nevojave themelore, furnizimin me ujë të pijshëm dhe ndihmën mjekësore. Më pas, përpjekjet u zhvendosën në rindërtimin e infrastrukturës sanitare dhe rrjetit të ujit të pijshëm.

Fushata “Swiss Solidarity” filloi më 31 gusht 2022, me mbështetjen e Korporatës Zvicerane të Transmetimit dhe mediave private, pasi Pakistani u godit nga shirat më të dendur të musonit në 30 vjet. Një e treta e vendit u përmbyt nga ujërat, teksa rreth 1700 njerëz humbën jetën dhe 30 milionë kishin nevojë për ndihmë.

Qeveria federale pagoi gjithashtu fonde ndihme urgjente për Pakistanin. Kjo arriti në 3,8 milionë CHF: 2,8 milionë CHF për Organizatën Ndërkombëtare për Migracionin (IOM), 800,000 CHF për përgjigjen emergjente të Agjencisë Zvicerane për Zhvillim dhe Bashkëpunim (SDC) dhe 200,000 CHF për Helvetas.