Përplasen protestuesit e opozitës dhe pozitës në Shkup

Disa qytetarë janë lënduar nga gurët dhe drunjtë e hedhur mes dy grupeve të protestuesve, ndërsa deputetët nuk i kanë kursyer grushtet në Kuvend

Oborri i Kuvendit të Maqedonisë është shndërruar në arenë përplasjesh ndërmjet qytetarëve të dy grupeve rivale, atyre të opozitës (LSDM) të cilët po e kundërshtojnë miratimin e shpejt të buxhetit të Maqedonisë për vitin 2013 dhe qytetarëve të pozitës (VMRO DPMNE) të cilët po e mbështesin miratimin e Ligjit për buxheti.

Sipas medieve nga Shkupi, disa qytetarë janë lënduar nga gurët dhe drunjtë e hedhur mes dy grupeve të protestuesve, ndërsa ligjvënësit brenda seancës plenare në Kuvend nuk i kanë kursyer edhe grushtet, shkelmat e shpullat në drejtim të njëri-tjetrit.

Përfaqësuesi i LSDM-së Branko Cërvenkovski ka thënë se buxhet është i destinuar për rritjen e rejtingut të kryeministrit Nikola Gruevski dhe jo për investime kapitale.

Mbështetësit e Cervenkovskit të mbledhur para Kuvendit maqedonas kan penguar hyrjen e ligjvënësve të koalicionit në Kuvend. Ata kanë shfrytëzuar hyrjet alternative.

Opozita, siç raporton REL, kundërshton miratimin e buxhetit për shkak të refuzimit të kërkesës së saj për shkurtimin e mbi 200 milionë eurove që beson se qeveria do t’i destinojë për harxhime promovuese dhe projekte jofitimprurëse.

“Sikur edhe meteorë të bien do të durojmë. Nuk largohemi nga këtu. Gruevski dëshiron të vrasë demokracisë, por këtë nuk do të lejojmë. Duan lufte? Do ta kenë! Nuk largohemi nga këtu. VMRO-DPMNE dhe BDI po luajnë me lojën e patriotëve të rrejshëm, po nxisin konfrontime dhe tensione, ndërsa vëllazërisht po ndajnë tenderët dhe provizionet”, ka thënë Cervenkovski.

Nga ana tjetër kryeministri Nikolla Gruevski iu ka bërë thirrje opozitës që të heqë dorë nga bllokadat dhe të lejojë miratimin e buxhetit pasi në të kundërtën, sipas tij, do të pësojnë qytetarët e Maqedonisë. Partitë politike shqiptare kanë qenë jashtë duelit LSDM-VMRO DPMNE.