Përvjetori i Pavarësisë, rast për të bërë bilance

Malaj: Ky vit mund të konsiderohet një faqe e një kapitulli të ri për Kosovën, i cili i jep fund pavarësisë së mbikëqyrur

Ambasada e Republikës së Kosovës në Bernë ka shënuar të enjten përvjetorin e katërt të pavarësisë së Kosovës. Dita e Pavarësisë, 17 Shkurti u kremtua me praninë e një numri të konsiderueshëm diplomatësh, pjesë e Korit Diplomatik të Bernës dhe përfaqësuesish të institucioneve zvicerane. Po kështu, në këtë kremte mori pjesë edhe ministri i Diasporës i Republikës së Kosovës, Ibrahim Makolli, zëvendësministri i ekonomisë, Ramadan Avdiu, ambasadori i Shqipërisë Mehmet Elezi dhe ai i Maqedonisë, Ramadan Nazifi.

Të pranishëm në pritje ishin edhe mjaft bashkatdhetarë, aktivistë në komunitetin e këtushëm shqiptar dhe persona afaristë.

Në fjalën e përshëndetjes, ambasadori i Kosovës në Bernë, Naim Malaj ka bërë një rakapitulim të periudhës në mes të dy përvjetorëve, nga 17 shkurti 2011 në 17 shkurtin e vitit 2012. “Ky vit, pa mëdyshje mund të konsiderohet një faqe e një kapitulli të ri për Kosovën. Një kapitull i ri, i cili i jep fund pavarësisë së mbikëqyrur dhe transformon Kosovën në një shtet si çdo shtet tjetër evropian”, ka thënë ambasadori Malaj. Pastaj ai ka sjellë në vëmendje të të pranishmëve fillimin e dialogut të Kosovës me Serbinë, që ka filluar vitin e kaluar. “Interesi kombëtar do të ruhet, ashtu sikur edhe stabiliteti dhe prosperiteti rajonal”, është shprehur Malaj, duke iu referuar rrjedhës së dialogut.

Ndërkaq, sipas ambasadorit të republikës së Kosovës në Bernë gjatë viteve të fundit, “Kosova ka shënuar edhe një stabilitet dhe rritje të vazhdueshme ekonomike. (…) Në një kohë kur kriza globale ka sfiduar vende shumë më të fuqishme , një dinamikë e tillë është mjaft e rrallë dhe meriton të përmendet”, ka thënë ai, duke inkurajuar investitorët potencialë nga Zvicra të investojnë në Kosovë.

Një pjesë të fjalës së tij ambasadori Malaj ia ka kushtuar marrëdhënieve në mes të Kosovës dhe Zvicrës, që ai i ka cilësuar si të shkëlqyera. “Gjatë vitit të kaluar janë zhvilluar disa vizita të delegacioneve qeveritare të Kosovës në Zvicër, ndër të cilat vlen të përmendet vizita e Ministrit të Punëve të Jashtme. Ndërsa gjatë vitit 2012 Zvicrën do ta vizitojë zyrtarisht kryetari i Parlamentit të Kosovës dhe ministri i diasporës”, ka potencuar Malaj. Ai nuk ka lënë pa përmendur edhe kontributin e mërgatës sonë në Zvicër, për përforcimin e marrëdhënieve në mes të Kosovës dhe Zvicrës.

Në njërën nga sallat e hotelit Bellevue Palace të Bernës, ku u mbajt pritja për nder të Ditës së pavarësisë, është prezantuar ekspozita me fotografi “Rrugëtimi i Kosovës”, krijim i Ilir Xheladinit, që pasqyron rrugën e vështirë që ka kaluar Kosova deri në arritjen e pavarësisë.

Foto galeria e jonë