Pesë familjarë të dyshuar për tentimvrasjen në Gjilan, e plagosën rojën e pyllit

FB: Policia e Kosoves

Të dielën në fshatin Gadish të Gjilanit u plagos një 33-vjeçar, pas një konflikti verbal me disa persona. Të dyshuarit janë anëtarë të një familje, që u kapën me viktimën, i cili është rojë i pyllit. Hetimet për këtë rast tashmë kanë nisur, ndërkohë që Policia ka kryer edhe bastisje.

Burime brenda Prokurorisë kanë bërë me dije se incidenti ka ndodhur te varrezat e fshatit, ku fillimisht 33-vjeçari që u plagos, i cili është rojë i pyllit, e kishte kapur në flagrancë një të mitur me armë në dorë, për çka kishte reaguar.

Veprimi i tij, për ta paralajmëruar të miturin që si pasojë e moshës së tij, nuk ka të drejtë për gjueti, prandaj duhej të largohej, e futi atë në sherr me familjen.

Pesë anëtarë të familjes dyshohet se e kanë sulmuar fizikisht viktimën, e më pas njëri prej tyre ka eskaluar në përdorim të armës – duke e lënë të plagosur, shkruan gazetaexpress.

Denoncimi i rastit vuri në lëvizje policinë, teksa viktima u dërgua në spital për të marrë trajtim mjekësor, si pasojë e plagëve që kishte pësuar.

Në anën tjetër, një njësi policore, ka kryer bastisje në shtëpinë e familjes, ku janë gjetur disa armë zjarri dhe dhjetëra fishekë, ndërsa edhe prova të tjera janë sekuestruar në vendin e ngjarjes.

Të dyshuarit janë shoqëruar në stacion policor, ku janë intervistuar në cilësinë e të dyshuarve, me ç’rast e kanë mohuar sulmin ndaj rojës së pyllit.

Lidhur me rastin, Prokurori i Shtetit ka urdhëruar inicimin e hetimit në drejtim të veprave penale “Vrasje në tentativë”, “Pjesëmarrje në rrahje” dhe “Shkaktim i rrezikut të përgjithshëm”, përcjell albinfo.ch.