Pesë të vdekur në aksidentet të shtunën në Kosovë

pixabay

Pesë persona kanë vdekur gjatë mbrëmjes së të shtunës si pasojë e aksidenteve të trafikut në Kosovë. Viktimat ishin nga tri aksidente në Podujevë, Pejë e Prishtinë.

Në rastin e parë, aksidenti ka ndodhur në rrugën Llapnasellë-Graçanicë. Në aksidentin e ndodhur rreth orës 16:30 janë përfshirë dy vetura. Si pasojë e aksidentit u lënduan dy persona, ndërsa njëri prej tyre nuk ka arritur t’u bëjë ballë lëndimeve. Vdekjen e ka konstatuar ekipi mjekësor në QKUK, ka njoftuar Policia, shkruan koha.net.

Rreth orës 20:30 në rrugën që lidh fshatrat Sfeqël dhe Shajkovc të Podujevës kanë humbur jetën dy persona, si pasojë e vetaksidentit.

Rasti i tretë ka ndodhur në fshatin Ozdrim të Pejës. Sipas njoftimit të Policisë, një veturë ka goditur për vdekje dy këmbësorë, ndërsa një tjetër ka marrë lëndime trupore dhe po trajtohet në Spitalin e Pejës.

Njësiti i trafikut i policisë po merret me rastet, ka thënë Policia, përcjell albinfo.ch.