Pllakë përkujtimore për viktimat e abuzuesve seksualë me petk kishtar

Deri në fund të vitit 2018, në Zvicër janë regjistruar 317 raste abuzimi që kanë pasur prapavijë kishtare

Një pllakë përkujtimore është vendosur sot në kishën (kapelën) e lokalitetit Closillon në Kantonin Valis për të përkujtuar viktimat e abuzimit seksual nga priftërinjtë valisianë, shkruan srf.ch.

Pllaka duhet të përkujtojë vuajtjet e të abuzuarve dhe ajo është vendosur me kërkesë të një viktime, ka thënë për mediat nënkryetari i Shoqatës për Mbështetjen e Personave të Abuzuar nga Autoritetet Fetare.

Ipeshkvia e Sionit ka ndërmarrë disa masa kundër kësaj dukurie, transmeton albinfo.ch. Në këto masa përfshihen edhe punëtori të detyrueshme për priftërinjtë dhe zyrtarët baritorë, për të parandaluar abuzimin seksual.

Deri në fund të vitit 2018, në Zvicër janë regjistruar 317 raste abuzimi që kanë pasur prapavijë kishtare.

Ndërsa Dioqeza e Sionit, kryeqytetit të Kantonit Valis vlerëson se numri i priftërinjve që kanë kryer abuzim seksual në këtë kanton midis viteve 1958 – 1992 ka qenë rreth pesëmbëdhjetë, përcjell albinfo.ch. Katër prej tyre janë akoma gjallë por nuk e praktikojnë më profesionin e klerikut.

Një rast tjetër nga viti 1962 është zbuluar në vitin 2019. Në total, preken disa dhjetëra viktima.

---