Policët në Kosovë po lënë punën për shkak të mungesës së kushteve

FB: Policia e Kosoves

Në muajt e fundit dhjetëra zyrtarë policor janë duke dhënë dorëheqje, kjo për shkak të kushteve të rënda të punës. Kryetari i Sindikatës së Policisë, Imer Zeqiri thotë se një prej arsyeve janë pagat e ulëta. “Vetëm këtë vit kemi 10 zyrtarë policorë që kanë dhënë dorëheqje aq sa kam unë informacione, nuk mund të themi se të gjitha rastet janë për Ligj të pagave, por janë për të gjitha këto kushtet, ka mundësi të jetë edhe ndonjë individ për shkaqe familjare, mirëpo nëse ndalemi që nga themelimi i Policisë së Kosovës e deri më tani kemi mbi 2200 dorëheqje vullnetare, e që ju e dini që Policia e Kosovës është themeluar në shtator 1999”, thotë ai për ekonomiaonline, përcjellë albinfo.ch.

Po ashtu arsye tjetër thotë se është edhe mungesa e Ligjit të Pensionimit. “Jemi polici pa Ligj të Pensionimit, e cila edhe kjo është një kërkesë që të kemi një ligj të pensionimit në moshën 55 vjeçare, arsyeja e parë është që mosha mesatare e policisë ka arritur në 47 vjet, mandej policët, zyrtarët policorë kur e përfundojnë karrierën janë pa pension, pse e them këtë, për shkak se ata e marrin një pension të pleqërisë, si çdo qytetarë tjetër që e arrin moshën 65 vjeçare edhe këta e marrin një pension të pleqërisë, kështu që vërtetë është diskriminuese dhe kjo është ajo kërkesë prioritare edhe për Sindikatën që ky ligj të dërgohet sa më parë në Kuvend për implementim, sepse ligji veç se është i hartuar dhe ka mundësi të bëhet vetëm me pak përmirësime të vogla dhe të ecë”, thotë Zeqiri për EO, përcjellë albinfo.ch.

Sipas kreut të sindikatës janë 2000 pjesëtarë të policisë që nga themelimi që kanë dhënë dorëheqje.