Policia austriake ndalon tetë shqiptarë në një veturë

Dy shtetas të Shqipërisë tentuan të kontrabandojnë gjashtë kosovarë

Në autostradën austriake S1, në afërsi të vendit Schwechat, në fillim të javës  janë arrestuar dy trafikantë të dyshuar. Sipas të dhënave të policisë austriake nga e enjtja, dy shqiptarët e Shqipërisë kishin transportuar gjashtë qytetarë kosovarë në një veturë, transmeton “albinfo.ch” lajmin e medieve austriake.

Shtetasit shqiptarë të moshës (28 dhe 38 vjeç) sipas policisë austriake akuzohen se kanë tentuar të trafikojnë pesë persona (24 deri 30-vjeç) dhe një të ri (16), që të gjithë pa të drejtë qëndrimi legal në territorin e Schengenit, për një shumë të caktuar parash.

Kosovarët kishin hipur në veturë në një vend parkim të autostradës, gjatë paradites të së hënës, ndërsa udhëtimi i tyre kishte përfunduar në Schwechat-Süd.

Dy shtetasit e Shqipërisë u arrestuan dhe po qendrojnë në burgun e Kroneuburgut.