Policia e Kosovës shënon rekord, shqipton 2366 tiketa për 24 orë

Masat e shtuara janë ndërmarrë pas rritjes së madhe të numrit të aksidenteve në trafik, disa prej të cilave kanë përfunduar me fatalitet

Policia e Kosovës ka thyer edhe një rekord sa i përket shqiptimit të gjobave në trafik. Vetëm brenda 24 orëve të fundit, Policia kosovare e trafikut ka shqiptuar 2366 tiketa për kundërvajtje në trafik.  Kjo nismë është pjesë e planit të Policisë për përmirësimin e nivelit të sigurisë në trafik dhe parandalimin e aksidenteve, për çka ditë më parë ka formuar një “Task Forcë“.

Masat e shtuara janë ndërmarrë pas rritjes së madhe të numrit të aksidenteve në trafik, disa prej të cilave kanë përfunduar me fatalitet, citon kallxo.com

Në raportin e sotëm ditor, Policia thotë se gjatë 24 orëve të kaluara kanë ndodhur 82 aksidente, prej të cilave 28 me të lënduar dhe 54 pa të lënduar.

Ndryshe, vetëm gjatë muajit korrik, nga shpejtësia e madhe në trafik kanë humbur jetën 16 qytetarë dhe mijëra të tjerë janë lënduar. Ndërsa rasti i fundit ka ndodhur tri ditë më parë, kur një djalë adoloshentë ka goditur dy këmbësorë, duke i mbytur në vend. Adoloshenti ngiste një veturë me targa të huaja.