Policia maqedonase vret dy të rinj shqiptarë

Raportohet se të vrarët janë Imran Mehmeti, 29 vjeç dhe Besnik Shehapi, 26 vjeç

　

Një pjesëtarë i policisë ka vrarë dy të rinj në Gostivar, pas një zënke për parkimin e makinës.

　

Sipas MPB-së, vrasësi është Jaqim Trifunovski, 39 vjeç, punonjës i policisë në stacionin policor për sigurimin e kufirit shtetëror Mazraça.

　

Ai ka vrarë dy të rinjtë pas një konflikti për parkimin e makinave. Polici ka shtënë në drejtim të të rinjve me pistoletën e tij zyrtare, mirëpo nuk ka qenë në detyrë, raportojnë mediet maqedonase.

　

Raportohet se të vrarët janë Imran Mehmeti, 29 vjeç dhe Besnik Shehapi, 26 vjeç.

　

Zëdhënësi i MPB-së, Ivo Kotevski, ka dhënë versionin e MPB-së lidhur me vrasjen.

　

“Punonjësi i policisë fillimisht ka shtënë me dy plumba në ajër në shenjë paralajmërimi. Por, më pas ka shtënë në personat nga të cilët është sulmuar me ç`rast ka plagosur të dy”, ka thënë Kotevski.

　

Vrasjet kanë ndodhur në rrugën “Kej Vardari” në afërsi të sallonit të mobileve “Montenegro”.　

　

MPB-ja, sipas mediave, ka ndërmarrë të gjitha masat për ndriçimin e vrasjes së dyfishtë, ndërsa pritet ngritja e kallëzimit penal kundër punonjësit të policisë.

　

---