Policia ndalon një “Rally” në Autostradë

Për të ndjekur këtë garë automobilistike të organizuar në mënyrë të kundërligjshme, në Autostradë ishin grumbulluar mbi 100 automjete, kryesisht të reja dhe të shpejta

Policia e Kosovës, në momentet e fundit, parandalon mbajtjen e një gare të rrezikshme me automjete në autostradën “Ibrahim Rugova”. Kjo garë ishte planifikuar nga një grup personash, të cilët kishin caktuar “startin” në kilometri e 52-të të autostradës së kombit, në afërsi të Malishevës.

Në vendin e ngjarjes, sipas Policisë, ishin grumbulluar mbi 100 automjete të ndryshme udhëtarësh, kryesisht automjete të reja dhe të shpejta me qellim të zhvillimit te garave me shpejtësi të lartë.

“Njësitet Policore të komunikacionit rrugor të caktuara për mbikëqyrje të autostradës mbrëmë me datë 05.08.213 rreth orës 24, kanë arritur të parandalojë mbajtjen e një gare të paparalajmëruar automobilistike në autostradën e Kosovës “Ibrahim Rugova”, thuhet në njoftim.

Për të përcjellë këtë garë automobilistike të organizuar në mënyrë të kundërligjshme, sipas Policisë kosovare, në autostradë ishin grumbulluar rreth 150 qytetarë të rajoneve të ndryshme të Kosovës.

Zhvillimet garave të kundërligjshme me automjete janë rreptësisht të ndaluara në bazë të ligjit për Sigurinë në Komunikacionin Rrugor Nr.02/L-70, saktësisht të sanksionuara  nga neni 55.4. Në bazë të këtij neni për kundërvajtje kryerësi dënohet me gjobë prej 130 deri në 400 euro.

Ngasësi i automjetit që vepron në kundërshtim me pikën D të paragrafit 1 të këtij neni, sipas Policisë, i shqiptohet masa e ndalimit të drejtuarit të mjetit motorik prej gjashtë  muajsh  deri  në një vit.

 “Policia e Kosovës me qëllim të ngritjes së sigurisë së komunikacionit rrugor dhe parandalimit të veprimeve të kundërligjshme apelon tek të gjithë qytetarët, pjesëmarrësit në komunikacionin rrugor që të respektojnë rregullat e komunikacionit rrugor, në të kundërtën do të ndërmerren masa konform ligjit ndaj ç’do kundërvajtësi”, thuhet në njoftim.