Policia vret të dyshuarin kryesor për sulmin në Barcelonë

Policia vret të dyshuarin kryesor për sulmin në Barcelonë

Keystone

Policia spanjolle ka qëlluar për vdekje të dyshuarin kryesor për sulmin e së enjtes së shkuar në Barcelonë, Younes Abouyaaqoub.

Policia beson se ai ishte ngasësi i kamionit që hyri në turmën në Las Ramblas duke lënë të vdekur 13 persona dhe duke lënduar më shumë se 100 të tjerë.

Ai u qëllua për vdekje rreth 40 kilometra në perëndim të Barcelonës afër një pompe benzine.

Abouyaaqoub, para se të qëllohej kishte kërcënuar me një rrip eksplozivi falso. Ai thuhet se ka bërtitur “Allahu Akbar”. Policia menjëherë kishte rrethuar vendin e ngjarjes dhe më pas kishin ekzaminuar vendin përmes robotëve për të gjetur se ky rrip nuk ishte bombë e vërtetë. Për këtë arsye u vonua deri në identifikimin zyrtar të Abouyaaqoubit.

Shteti Islamik ka marrë përgjegjësinë për sulmet e javës së shkuar në Spanjë, edhe pse nuk dihet akoma nëse ndonjë nga sulmuesit kishte lidhje direkte me këtë grup, shkruan BBC.