Nëse e keni aplikacionin Uber në Zvicër, mund të bëheni shënjestër e kriminelëve kibernetikë që hiqen si platforma e njohur e transportit.
Ashtu si përpjekjet e shumta të tjera për mashtrim, edhe kjo synon të marrë informacionin bankar të viktimave dhe t’u vjedhë paratë.
Ja si funksionon:
Me pretekstin e verifikimit të të dhënave të pagesës, një email, i dërguar gjoja nga Uber por në fakt nga mashtruesit, me titullin “Action Required” (Kërkohet veprim), i kërkon marrësit të verifikojë ose përditësojë informacionin e tij të pagesës.
Ofrohet një lidhje (link) për të kryer këtë hap, e cila e drejton viktimën në një ndërfaqe që imiton panelin e menaxhimit të llogarisë Uber, ku duhet të futen të dhënat bankare.
Duke kryer këtë veprim, viktima bën pikërisht atë që duan mashtruesit: u jep informacionin që u nevojitet jo vetëm për të zbrazur llogarinë, por edhe për të kryer lloje të tjera mashtrimesh.
Një shenjë paralajmëruese
Kompanitë legjitime zakonisht nuk u dërgojnë email-e (ose mesazhe në WhatsApp apo SMS) klientëve të tyre duke u kërkuar të japin ose verifikojnë informacionin e pagesës.
Nëse është e nevojshme, ato do t’ju kontaktojnë dhe do t’ju kërkojnë t’i telefononi për të sqaruar këto detaje.
Prandaj, policia kibernetike zvicerane këshillon të mos klikoni mbi lidhjet në mesazhe të dyshimta dhe paralajmëron që të mos ndani kurrë të dhënat bankare me palë të treta pa verifikuar fillimisht vërtetësinë e kërkesës, transmeton albinfo.ch.
Kushdo që e ka dhënë tashmë informacionin duhet të kontaktojë menjëherë bankën e tij për të bllokuar kartat e prekura dhe për të provuar rikuperimin e pagesave të kryera – megjithëse, realisht, gjasat për të rimarrë paratë e vjedhura nuk janë të mëdha.
Mashtrimi me Uber është vetëm përpjekja më e fundit për t’u marrë paratë viktimave.
Një aktivitet i tillë – qoftë i kryer në internet, përmes telefonit apo ndonjëherë edhe personalisht – po bëhet gjithnjë e më i shpeshtë.
Edhe pse askush nuk është i sigurt nga këto përpjekje, disa prej tyre synojnë në mënyrë specifike banorët e huaj; për shembull, një mashtrim lidhur me emigracionin, ku ofrohet një punë fiktive në industrinë e hotelerisë, ndërsa dërguesit kërkojnë pagesa prej 300 deri në 1,000 euro për një leje qëndrimi në Zvicër dhe për sigurimin shëndetësor e atë kundër aksidenteve, ose dërgojnë letra që duken zyrtare dhe u thonë emigrantëve se duhet të largohen nga Zvicra.
