Prodhuesi zviceran i trenave, Stadler Rail, ka fituar kontratën për pjesën e dytë të një porosie të madhe nga Arabia Saudite. Kompania Saudi Arabian Railways (SAR) ka porositur dhjetë trena të tjerë të tipit “Intercity” me vlerë 300 milionë franga zvicerane.
Me këtë porosi, SAR ka aktivizuar një opsion të parashikuar në kontratën e nënshkruar dy vite më parë, e cila kishte një vlerë prej rreth 600 milionë frangash zvicerane.
Kjo e dyfishon flotën e trenave të zhvilluar posaçërisht për Arabinë Saudite, duke e çuar numrin total në 20, njoftoi Stadler të premten, transmeton albinfo.ch.
Kontrata ekzistuese e mirëmbajtjes do të zgjerohet për të përfshirë edhe këta trena shtesë.
Trenat “Intercity”, me gjatësi rreth 175 metrash, janë projektuar për t’iu përshtatur kushteve klimatike dhe operacionale të Arabisë Saudite. Ata janë të pajisur me dy njësi motorike të pavarura dhe sisteme të shumta rezervë (redundante), shkruan swissinfo.
Për funksionimin në kushte të nxehtësisë ekstreme dhe pranisë së rërës, janë integruar sisteme të veçanta mbrojtjeje dhe filtrimi.
Trenat, të cilët kanë kapacitet për rreth 320 pasagjerë, do të vihen në shërbim në linjën lindje-perëndim të SAR-it. Ata do të lidhin rajonet e Riadit, Hofufit, Abkaikut dhe Dammam-it.
Trenat e rinj do të prodhohen kryesisht në fabrikat e Stadler-it në Zvicër. Strukturat e karrocerisë për njësitë motorike do të vijnë nga fabrika e Stadler-it në Valencia të Spanjës.
Prodhimi do të vijojë menjëherë pas përfundimit të serisë së parë, e cila nisi në prill të vitit 2026. Sipas Stadler-it, shërbimet komerciale për pasagjerët pritet të fillojnë në gjysmën e dytë të vitit 2029.
