Presidenti shuan shpresat për një zbutje të shpejtë të masave në Zvicër

Parmelin: "Zvicra ende duhet të presë para se të hapen restorantet dhe të lejohen ngjarje publike"

Presidenti federal Guy Parmelin ka zbehur shpresat për një lehtësim të shpejtë dhe të madh të masave të koronës. Zhvillimet lidhur me pandeminë jashtë vendit dhe në Zvicër lënë fare pak hapësirë ​​për manovrim, është shprehur Parmelin në një intervistë për gazetën “SonntagsZeitung”.

Këshilli Federal ka ndërmarrë një hap duke lehtësuar takimet private, ka thënë ai, duke iu referuar masave të marra më 22 mars, transmeton albinfo.ch. Por, Zvicra ende duhet të presë para se të hapen restorantet dhe të lejohen ngjarje publike. Ai gjithesi, e kupton padurimin dhe pakënaqësinë në popullatë. “Edhe unë do të dëshiroja të pi një gotë verë në një tarracë”, ka thënë ai.

“U bëj thirrje të gjithëve që të mbajnë disiplinën që kanë treguar deri më tani. Ne duhet të mbahemi të bashkuar tani “, ka theksuar Parmelin.

Ai e konsideron si mundësi interesante sugjerimin e bërë nga gazetari sipas të cilit njerëzve me test negativ duhet t`u lejohet të marrin pjesë në aktivitete masive.

Këshilli Federal duhet ta shqyrtojë këtë sugjerim për hapin tjetër të hapjes.

Më tutje, Parmelin shprehet në favor të bashkëpunimit më të ngushtë në Evropë, përcjell albinfo.ch. Zvicra, sipas tij, mund të ndihmojë në ndërtimin e një industrie vaksinimesh me bazë të gjerë në Evropë.

Kjo do të bëhej për t`i ikur varësisë nga prodhuesit jashtë evropianë të vaksinave

---