Presidenti Meta nuk e jep autorizimin për marrëveshjen për detin

Në letrën e tij, Presidenti Meta thotë se kërkesa nuk përkufizon qartë objektin e negociatave për të cilin kërkohet Autorizim për Plotfuqi

Kërkesa e Ministrisë për Evropën dhe Punët e Jashtme ka marrë përgjigjeje negative nga Presidenti i Shqipërisë Ilir Meta.  Presidenti shpjegon tri arsyet pse nuk vendosi t’i japë momentalisht plotfuqishmërinë për negociatat me Greqinë.

Në letrën e tij, Presidenti Meta thotë se kërkesa nuk përkufizon qartë objektin e negociatave për të cilin kërkohet Autorizim për Plotfuqi. Meta kërkon të qartësohet në mënyrë të mirëpërcaktuar objekti i kërkesës për negocim, duke përmbushur të gjitha mangësitë e konstatuara.

“Si konkluzion, përcaktimi i qartë i objektit të negocimit dhe vënia në jetë e detyrës së marrë nga grupi negociator që formalizohet në aktin e Autorizimit për Plotfuqi që Presidenti i Republikës lëshon nëpërmjet delegimit është një kërkesë e qartë e neneve 3, 4, 7 dhe 92/ë, të cilat shpjegohen gjerësisht në mënyrë shteruese në Vendimin nr. 15/2010, të Gjykatës Kushtetuese”, thuhet në letrën e Presidentit.